كلنا شوفنا الحرب اللى على الأهلى من كثير من الناس سواءاً إعلامين او حاقدين أو حكام أو حتى من بعض أبناء النادى وحتى من بعض لاعبى كرة القدم المنتدبين من ساحة مصارعة "كيك بوكس " للتخليص على ماتبقى من مواهب فى مصر وخاصة فى الأهلى والحمد لله مازال الأهلى واقف شامخ ودايما إن شاء الله يفضل كده على طول
دلوقتى نيجى للحرب القادمه المتوقعه واللى بدأت تدق طبولها منذ الإعلان عن قناة الأهلى
الباشوات اياهم زى مايكون خبر قناة الأهلى كان سر وقال يعنى مكنوش عارفين ان من سنين والأهلى هيعمل قناه وبمجرد الإعلان عنها بدأ السؤال هو من حق الأهلى البث الحصرى لمبارياته ام لا ؟ وتلاقى كل واحد يقولك نشوف الوضع القانونى هل من حق الأهلى قصر مبارياته على قناته فقط ام لا؟
طيب ياساده لسه فاكرين دلوقتى تسألوا كنتم نايمين فين من سنين.
دلوقتى نيجى لموضوع حق البث من عدمه وعايز اسأل سؤال هو من حق الأهلى أو اى فريق انه مايذعش مبارياته ام لا؟؟ اعتقد ان من حق كل فريق عدم إذاعتها حتى يضمن وجود الجماهير وقبل كده عملها الزمالك . طيب إذا كان من حقه مايذعش يبقى بتتكلموا فى حقوق الاتحاد فى البث والكلام الفاضى ده ليه ؟؟
كل من هب ودب دلوقتى بقى قلبه ياولداه على الجماهير وبيسأل ازاى الأهلى يبث حصرى وازاى اتحاد الكره المسؤول عن اللعبه مايكلش من التورته ده إذا كان فيه تورته أصلا
ومع إن الأهلى قال ان البث الحصرى مقتصر فقط على الفضائيات يعنى هايذيع أرضى يبقى فين الحرمان اللى بتتكلموا عنه
وبدأ الكلام من ناس تانيه ان الأهلى مش أول فريق عربى يعمل قناه خاصه به طاب ياعم الحاج اول ولا تانى هى دى المشكله ولا ايه احنا ليه بنيجى فى الهايفه ونتكلم
والافنديه اللى شغالين فى قنوات خاصه دلوقتى بتنقل دورى مصر هما كمان خايفين على السبوبه وليه وليه الأهلى يحتكر البث لمبارياته طيب وهما هيبقى ايه دورهم فى الحكايه دى لا لا مينفعش كده ده وقف حال يابا وانت السبب يابا والدموع هتنزل بس يظهر دموع تماسيح
وبعدين تلاقى خبر يقولك الزمالك عايز يعمل بث لقناته على الفضائيه المصريه عشان يلحق يبث قبل الأهلى وكأن الزمالك كان مستنى الأهلى يعلن عن قناته حتى يعلن هو كمان ويالله ياواد انت وهو بسرعه طلعونا قناة الزمالك لاتقولى دراسه ولا غيره ولا اسلوب إدارى سليم ولا غيره المهم نبث قبل قناة الأهلى وكأن الحكايه مجرد مين يسبق مين بدون اى تخطيط وكأن المعركه معركة مين اللى عمل قناه الأول وكأن الأنتصارات على الورق فقط ومش بالبطولات ويفيد ايه لو عندنا عشر قنوات خاصه بالنادى ومفيش بطولات هل بكده يبقى احنا شطار عشان بندور على سبق وانتصار وهمى؟؟
توقعوا ياساده ضراوة الحرب القادمه ضد قناة الأهلى فقد دقت طبولها والكل يستنفر قواه لهذه المعركه ولكن بإذن الله سيخرج الأهلى منتصر منها
نأسف على الإطاله
موضوع: (((((( الحرب القادمه ضد الأهلى )))))) 
السبت فبراير 24, 2007 9:55 am
